ပုံပြောသူ
ပျဉ်းမပွင့်ပြီ သခွက်ပွင့်ပြီ
ကသစ်ပွင့်ပြီ ပိတောက်ပွင့်ပြီ
သင်္ကြန်လာပြီ ဒိုးသံလာပြီ
မိုးရွာတော့မယ် သူငယ်ချင်းတို့
(အောင်ချိမ့်)
ပျဉ်းမပွင့်ပြီ သခွက်ပွင့်ပြီ
ကသစ်ပွင့်ပြီ ပိတောက်ပွင့်ပြီ
သင်္ကြန်လာပြီ ဒိုးသံလာပြီ
မိုးရွာတော့မယ် သူငယ်ချင်းတို့
(အောင်ချိမ့်)
ကဗျာဆရာ ကိုအောင်ချိမ့်ကတော့ ပိတောက်ပွင့်ပြီ၊ သင်္ကြန်လာပြီ…ဆိုပြီး ပုံပြောသူတဲ့။ ကိုအောင်ချိမ့်ကတော့ ဟိုနေ့နိုးနိုး ဒီနေ့နိုးနိုး အိပ်မက်တွေ ပေးတတ်သူကို တင်စားထားသည် ထင်ပါရဲ့။ ကိုအောင်ချိမ့်အတွက်တော့ ပုံပြောသူ ဖြစ်ကောင်းဖြစ်ပေမယ့် ပျဉ်းမပွင့်ချိန်မှာ၊ သခွက်တွေ ပွင့်ချိန်မှာ၊ ကသစ်တွေ ပွင့်ချိန်မှာ၊ ပိတောက်တွေ ပွင့်ချိန်မှာ၊ သင်္ကြန်ကျပြီးလို့ မိုးတွေ ရွာလာတဲ့အချိန်မှာ အိပ်မက်တွေ အမှန်တကယ် ဖြစ်ကြသူတွေလည်း ရှိမှာ အသေအချာပဲ။ အိပ်မက်တွေ အမှန်တကယ် ဖြစ်လာကြသလား၊ မဖြစ်လာကြသလားတော့ မသိဘူး။ သင်္ကြန်ကျလို့ မိုးတွေ ရွာချလိုက်ပြီ။
တစ်နှစ်ကို ကူးသွားပြီ။
ကျန်ခဲ့တဲ့ နှစ်တွေမှာ ပုံပြင်တွေ ဘယ်လောက်များ ပြောခဲ့ကြသလဲ၊
ပုံပြင်တွေ ဘယ်လောက်များ အပြောခံခဲ့ကြရသလဲ။
အိပ်မက်တွေ ဘယ်လောက်များ ဖွဲ့တည်နိုင်ခဲ့ကြသလဲ။
အိပ်မက်တွေ ဘယ်လောက်များ ဖဲ့ချွေခံခဲ့ကြရသလဲ။
ပိတောက်တွေနဲ့အတူ အပြုံးတွေ မြင်နေရသူလည်း ရှိလိမ့်မယ်။
ပိတောက်တွေကို ခါးခါးသီးသီး အကြည့်တွေနဲ့ ငေးမှိုင်နေသူတွေလည်း ရှိလိမ့်မယ်။
ပိတောက်တွေနဲ့အတူ ကခုန်မြူးတူးသူတွေလည်း ရှိလိမ့်မယ်။
ပိတောက်တွေနဲ့အတူ တောက်ခေါက်သံကျယ်လောင်နေသူတွေလည်း ရှိလိမ့်မယ်။
ပိတောက်တွေကို ဘ၀ရဲ့ တောက်ပမှုနဲ့ တင်စားနေသူလည်း ရှိလိမ့်မယ်။
ပိတောက်တွေ ဖူးပွင့်လာတိုင်း ဖူးလ်(fool) ဖြစ်နေသူတွေလည်း ရှိလိမ့်မယ်။
ဘာပဲဖြစ်ဖြစ် ပိတောက်က ရောက်လာခဲ့လေပြီ။
ပိတောက်ကို ကြိုမှာလား၊
ပိတောက်ကို ငြင်းမလား။
ကြိုသည်ဖြစ်စေ၊ ငြင်းသည်ဖြစ်စေ…
ပိတောက်က ပြောနေပြီ။
“မင်းရဲ့
လူ့ဘ၀မှာ နေထိုင်ခွင့်
ငါ
တစ်နှစ် နှုတ်လိုက်ပြီ”။
No comments:
Post a Comment