ကူဋဒန္တသုတ်တော်အား လေ့လာသုံးသပ်ခြင်း (မြတ်ဗုဒ္ဓ၏ တိုင်းပြည် ငြိမ်းချမ်းတိုးတက်ရေး)......အဆက်

(၁)

စာပေကို ချဉ်းကပ်ရာတွင် နည်းအမျိုးမျိုး ရှိပါသည်။ ချဉ်းကပ်မှုအပေါ်မူတည်၍ အတွေးအမြင်များလည်း ကွဲပြားစွာ ဖြစ်တည်လာရသည်။ ချဉ်းကပ်မှုကြောင့် အတွေးအမြင်၊ အယူအဆများ ကွဲပြားသွားသော်လည်း မူရင်းအနှစ်သာရကို ဆုတ်ကိုင်မိဖို့လည်း အရေးကြီးပါသည်။ တစ်နည်းအားဖြင့် မူရင်းအနှစ်သာရကို ဆုတ်ကိုင်ပြီး သင်္ခန်းစာကိုကား မိမိရှုထောင့်အလိုက်၊ ဘ၀ဖြတ်သန်းမှုအလိုက်၊ ကိုယ်ခံအားအလိုက် အမျိုးမျိုး ထုတ်ယူကြပါလိမ့်မည်။

အမှန်အားဖြင့် ဤကူဋဒန္တသုတ်တော်ကို စာတမ်းတစ်စောင်၊ ကျမ်းတစ်စောင်အနေအားဖြင့် ရှုထောင့်ပေါင်းစုံမှ အကျယ်တ၀င့်လေ့လာတင်ပြနိုင်လျှင် ပို၍ ပြည့်စုံကောင်းမွန်သွားနိုင်စရာ ရှိပါသည်။ စာပေတစ်ခု သို့မဟုတ် အခြင်းအရာတစ်ခုကို ချဉ်းကပ်ရာတွင် Philosophical Approach, Sociological Approach, Political Approach စသည်ဖြင့် ချဉ်းကပ်ပုံအမျိုးမျိုး ရှိနိုင်ပါသည်။ ယခု စာရေးသူက ဤဆောင်းပါးရှည်ကို အဘယ်ရှုထောင့်မှ ချဉ်းကပ်သည်ဟု သတ်မှတ်ပိုင်းခြားမထားပေ။ ဗုဒ္ဓမြတ်စွာ၏ ဟောကြားချက်ကို ဖတ်ရှုရင်း ရရှိလာသော ရိုက်ခတ်မှုကလေးမျှကို ခံစားတင်ပြထားခြင်းသာ ဖြစ်ပါသည်။

စာရေးသူက ဒုတိယခေါင်းစဉ်အဖြစ် `တိုင်းပြည်ငြိမ်းချမ်းတိုးတက်ရေး´ဟု အမည်ပေးထားသော်လည်း တိုင်းပြည်ငြိမ်းချမ်းတိုးတက်ရေးသာမက ဘ၀လွတ်မြောက်ရေးကိုလည်း ဤသုတ်တော်က ကိုယ်စားပြုနေပါသည်။ သို့ရာတွင် တိုင်းပြည်က ငြိမ်းချမ်းမှု၊ တိုးတက်မှု မရှိလျှင်၊ ရှိသင့်ရှိထိုက်သော တရားမျှတမျှများ ဆိတ်သုဉ်းနေလျှင် ဘ၀လွတ်မြောက်ရေးသို့ တက်လှမ်းရာတွင် အခက်ကြုံတတ်ပုံ၊ သို့မဟုတ် တိုင်းပြည်က အုပ်ချုပ်သူနှင့် အုပ်ချုပ်ခံလူတန်းစားတို့ သဟဇာတမဖြစ်လျှင်၊ သို့မဟုတ် စည်းလုံးညီညွတ်မှုမရှိလျှင် တိုင်းပြည်ငြိမ်းချမ်းတိုးတက်ဖို့ မလွယ်ကူပုံတို့ကို မီးမောင်းထိုးပြထားပါသည်။ လောကီအရေးနှင့် လောကုတ္တရာအရေးတို့မှာ ကြောင်လှောင်သံကွင်းဆက်ကဲ့သို့ အချင်းချင်း အမှီသဟဲ ဖြစ်နေပုံတို့ကို ဟောကြားထားခဲ့သည်။

မူရင်းပါဠိတော်မြန်မာပြန်တို့ကို လူသာမန်တို့အနေဖြင့် (စာပေဟန်ကြောင့်) ပြည့်ပြည့်၀၀ နားလည်ဖို့ မလွယ်ကူပေ။ အဆိုပါ အခက်အခဲတစ်ခုကို ဖြေရှင်းပေးခြင်းဖြင့် ကုသိုလ်ဖြစ်လိုသောကြောင့် ဤစာကို ရေးသားတင်ပြရခြင်း ဖြစ်ပါသည်။ အစစ အရာရာ ပြည့်စုံနားလည်ပြီးသော ပညာရှင်များအတွက် စာရေးသူတင်ပြမှုကြောင့် မူရင်းအရသာပျက်သည်ဟု ဆိုလျှင်လည်း အပြုံးမပျက် နားလည်ပေးပါမည်။ စာရေးသူအတွက်မူကား မိမိကုသိုလ်နှင့်မိမိ ပီတိဖြစ်နေပါလိမ့်မည်။

(အထူးမှာချင်သည်မှာ အချို့အချက်များကို စာရေးသူက ဖြည့်စွက်တင်ပြထားမှုမရှိသော်လည်း (အချက်တိုင်းကို)လေးလေးနက်နက် တွေးဆပြီး ဖတ်ရှုစေလိုပါသည်။ တွေးတွေးဆဆ ဖတ်ရှုလေလေ မိမိ၏ စိတ်ပိုင်းဆိုင်ရာ အယူအဆများကို ဆန်းစစ်မိပြီး အစဉ်အလာမှားယွင်းမှုများကို သိမြင်လာလေလေ ဖြစ်မှာသေချာပါသည်။ `ဗုဒ္ဓ၀ါဒအစစ်အမှန်ဟာ ဘာလဲ´ဟူသည့်အမေးကိုလည်း မိမိကိုယ်တိုင် ဖြေတတ်သွားလိမ့်မည်။ ထိုသို့ သိမြင်နားလည်သည့်အလျောက် ဗုဒ္ဓမြတ်စွာအား လေးစားကြည်ညိုမှုများ တိုးပွားလေမည်။ ကြည်ညိုမှုများ တိုးပွားသည့်အလျောက် ကုသိုလ်စိတ်များ တိုးပွားလာပေလိမ့်မည်။ သို့ဖြစ်၍ ဂရုတစိုက် မှတ်သားဖတ်ရှုစေလိုကြောင်း တိုက်တွန်းမှာကြားလိုပါသည်။)

(၂)

ဗုဒ္ဓမြတ်စွာသည် ဘ၀လွတ်မြောက်မှုကို လောကတွင်း ရှင်သန်လှုပ်ရှားမှုများနှင့် မကွာမလွတ်စေရ။ လောကတွင်းမှာ နေရင်းဖြင့် သောကကင်းသော လွတ်မြောက်မှုကို ရနိုင်ဖို့ ညွှန်ပြ၏။ ကူဋဒန္တသုတ်သည် အမှန်အားဖြင့် လောကငြိမ်းချမ်းရေးမှသည် ဘ၀လွတ်မြောက်မှုသို့ ကောက်ကြောင်းပေးထားသော သုတ်ဖြစ်၏။ ဘ၀နေထိုင်ရေးလမ်းညွှန်ချက်ဖြစ်သကဲ့သို့ နိုင်ငံရေးသဘောတရားတစ်ရပ်လည်း ဖြစ်၏။ ရုပ်ဝတ္ထုကြွယ်ဝရေးတရားဖြစ်သကဲ့သို့ စိတ်အေးချမ်းမှု ရစေနိုင်သောတရားလည်း ဖြစ်၏။ နိုင်ငံတိုင်း နိုင်ငံတိုင်း ဗုဒ္ဓညွှန်ပြထားသော ဤလမ်းညွှန်ချက်နဲ့အညီ အုပ်ချုပ်နိုင်လျှင် နိုင်ငံတော်၏ ချမ်းသာကြွယ်ဝမှုနှင့် စိတ်ငြိမ်းချမ်းရေးကို ပူးတွဲပိုင်ဆိုင်နိုင်လာမည်မှာ သေချာ၏။

အခါတစ်ပါး၌ မြတ်စွာဘုရားသည် ရဟန်းငါးရာနှင့် ခါဏုမတအမည်ရှိသော ပုဏ္ဏားရွာသို့ ကြွရောက်လာခဲ့၏။ ထိုစဉ်အခါ၌ ကူဋဒန္တပုဏ္ဏားသည် ဗိမ္ဗိသာရမင်းက ဆုလာဘ်အဖြစ်ဖြင့် အပိုင်စားပေးထားသော `ခါဏုမတ´ရွာကို အုပ်ချုပ်နေ၏။ ထိုစဉ်အခါ၌ ကူဋဒန္တပုဏ္ဏားသည် ယဇ်ကြီး(အလှူကြီး)ကို စီရင်လျက် ရှိ၏၊ (ထိုသို့စီရင်ရာ၌) ယဇ်ပူဇော်ရန်အတွက် နွားလား ခုနစ်ရာ၊ နွားထီးငယ် ခုနစ်ရာ၊ နွားမငယ် ခုနစ်ရာ၊ ဆိတ် ခုနစ်ရာ၊ သိုး ခုနစ်ရာတို့ကို ယဇ်တိုင်သို့ ပို့ဆောင်ထားကုန်၏။

သူ့ခေတ် သူ့အခါအရ လွှမ်းမိုးထားသော ဘာသာရေးအသိဉာဏ်များအရ ကုသိုလ်ကောင်းမှု၏ စံနှုန်းကား ယဇ်ပူဇော်ခြင်းပင် ဖြစ်၏။ ယနေ့ခေတ်အခါမှာ စီးပွားရေးမကောင်းလျှင်၊ ကျန်းမာရေးမကောင်းလျှင်…မိမိတို့ ကိုးကွယ်မှုအလျောက် ဘာသာရေးထုံးတမ်းများကို စီရင်ပြုလုပ်လေ့ရှိ၏။ မည်သူမျှ မသိမမြင်နိုင်သော နတ်ဘုရားများကို သတ္တ၀ါများသတ်ဖြတ်ပူဇော်ခြင်းဖြင့် ယဇ်ပူဇော်ခြင်းသည် ထိုခေတ်အခါက လုပ်ရိုးလုပ်စဉ်ဖြစ်၏။

အချို့ဘာသာကြီးများ၏ ကျမ်းစာများတွင်လည်း တိရစ္ဆာန်များ ထောင်သောင်းများစွာ သတ်ဖြတ်၍ ယဇ်ပူဇော်မှုကို ယနေ့တိုင်အောင် ယုံကြည်အားကိုးမြဲ အားကိုလျှက်ရှိ၏။ သိုးအကောင်ရေ ၅၀၀၀၊ နွားအကောင်ရေ ၁၀၀၀၀…စသည်တို့ကို သတ်ဖြတ်၍ သူတို့ကိုးကွယ်အားထားသော ဘုရားသခင်ကို သတ်ဖြတ်ပူဇော်ကြ၏။ ထိုကဲ့သို့သော ယဇ်ကြီးများကို (မြင်မကောင်းရှုမကောင်း၍) ယနေ့ကာလများတွင် မတွေ့နိုင်တော့သော်လည်း ယင်းယဇ်ပူဇော်မှုများ ရေးမှတ်ထားသောကျမ်းစာကိုကား အမြတ်တနိုး ထားမြဲထားလျှက်ရှိ၏။

ကူဋဒန္တသည်လည်း တိုင်းပြည်တွင်း ဆူပူသောင်းကျန်းသူများ ပေါများပြီး တိုင်းပြည်စီးပွားရေး ကျဆင်းနေသဖြင့် အထက်ပါ ယဇ်ကြီးကို ပြုလုပ်လိုခြင်း ဖြစ်၏။ သတ္တ၀ါ ၇၅၀၀-သည် တိုင်းပြည်စီးပွားရေး မကောင်းမှုကြောင့် သွေးချောင်းစီးရတော့မည့်သဘော ကြုံတွေ့နေရ၏။

ထိုအချိန်အခါတွင် ဗုဒ္ဓမြတ်စွာ ကြွရောက်လာ၏။ ခါဏုမတရွာနေ ပုဏ္ဏားနှင့် အမျိုးသားတို့သည် ဗုဒ္ဓမြတ်စွာ ကြွလာကြောင်းကို ကြားသိရ၍ ဘုရားရှင်တည်းခိုရာ အမ္ဗလဋ္ဌိကာ (ဥယျာဉ်) ဆီသို့ သွားကြ၏။ ကူဋဒန္တပုဏ္ဏားသည် ပြာသာဒ်ထက်၌ နေ့အချိန် လျောင်းစက်နေစဉ် ဗုဒ္ဓမြတ်စွာထံသို့ သွားကုန်သော ပုဏ္ဏားနှင့်အမျိုးသားတို့ကိုမြင်သောအခါ ''ရဟန်း ဂေါတမဟာ စိတ်ထားသုံးမျိုး၊ အရံအတား (၁၆)ပါးနှင့်ပြည့်စုံတဲ့ ယဇ်ကို သိတယ်လို့ ငါ ကြားဖူးတယ်။ ငါကတော့ မသိဘူး၊ ယဇ်ကြီးလဲ ငါ ပူဇော်ချင်တယ်၊ ရဟန်းဂေါတမထံသွားပြီး မေးရရင် ကောင်းမယ်''ဟု အကြံဖြစ်၏။

ရာပေါင်းများစွာသော ပုဏ္ဏားတို့သည် ''အရှင် ရဟန်းဂေါတမထံသို့ မသွားသင့်ပါ။ ရဟန်းဂေါတမထံသွားလျှင် အရှင်၏ ဂုဏ်သိက္ခာကျလိမ့်မည်၊ ရဟန်းဂေါတမ၏ ဂုဏ်သတင်းသည် တိုးပွါးပါလိမ့်မည်၊ ရဟန်းဂေါတမကသာ အရှင့်ကို ဖူေးမြာ်လာသင့်ပါ၏။ အရှင်သည် ဇာတ်အားဖြင့်လည်း ရဟန်းဂေါတမထက် မြင့်မြတ်၏။ ရဟန်းဂေါတမထက်လည်း စည်းစိမ်ကြွယ်ဝ၏။ လောကာယတကျမ်း၊ မဟာပုရိသလက္ခဏာကျမ်းတို့၌ အကြွင်းမဲ့ တတ်မြောက်၏။ အရှင်သည် အဆင်းလှ၏၊ ရှုချင်ဖွယ်ရှိ၏၊ ကြည်ညိုဖွယ်ရှိ၏၊ ခံ့ညားသော ကိုယ်ခန္ဓာရှိ၏။ အရှင်သည် သီလလည်း ရှိ၏၊ အပြောလည်း ကောင်း၏။ လူများစွာတို့၏ ဆရာဖြစ်၏၊ ဆရာ့ဆရာလည်း ဖြစ်၏၊ လုလင်သုံးရာတို့အား ဝေဒကျမ်းတို့ကို ပို့ချ၏၊ အရှင်သည် အိုမင်း၏၊ (အသက်) ကြီး၏၊ (အရွယ်) ရင့်၏၊ ရှေးမီ၏၊ နောက်ဆုံးအရွယ်သို့ရောက်လျက် ရှိ၏၊

ဆက်လက်ဖော်ပြပါမည်...